Ena Murray Omnibus 38

En die klippe sal uitroep_x000D_Emile de Jongh, kroonprins en hartebreker van die modelplaas La Rhône, is op dertig 'n gesogte vangs onder die skoner geslag. _x000D__x000D_Maar in Miempie Rust, die nuwe verpleegsuster vir die distrik, loop hy egter sy rieme styf. Want Miempie is nie beïndruk met Emile se sjarme nie. Sy verlang eerder na reg en geregtigheid - veral teenoor die plaaswerkers. Dié vurige kampvegter vir menseregte het 'n hart wat onstilbaar klop . . . Vir Martha wat al vergeet het van boontoe beur en wegbreek na 'n beter lewe. Vir Maria, haar mooi dogter met die droom om dokter te word. _x000D__x000D_Daar is geen reënboog vir ons nie. God het dit vir die ander mense gestuur en die rykes kry die pot goud daarby - van ons hier op die plase en in die strooise het Hy vergeet . . . refrein Martha se bitter klag in Miempie se hart. _x000D__x000D_Wat is jy werd as jy nie meer ideale en 'n gewete het nie? Hoe moet die wêreld 'n beter plek word as almal net stilbly? Miempie rus nie voordat sy nie die klippe laat uitroep nie . . ._x000D__x000D_Die tonnel_x000D_Tot dusver het die lewe nog geen droomsterre vir die sensitiewe Ilse Rademeyer laat verskiet nie. Sy is op eenjarige ouderdom verlam weens 'n motorongeluk waarin haar ma sterf. Haar pa is 'n briljante wetenskaplike wat in sy eie afgeslote wêreld leef, en haar stiefbroer, Mynhardt, is 'n losbol en 'n rokjagter . . . _x000D__x000D_Toe Markus Rademeyer op sy sterfbed lê, skroei die skuldgevoelens deur sy hart. Wat gaan van sy verlamde dogter word? Want Mynhardt, sy stiefseun, het so 'n reusebedrag geld by hom geleen dat daar geen sprake is van 'n goeie erfporsie aan Ilse nie. _x000D__x000D_Maar dan bedink hy 'n oplossing. Nóg Ilse nóg Mynhardt sou ooit uit hul eie tot iets so waansinnigs ingestem het, maar diep in sy hart weet hy dit is die regte besluit . . . _x000D__x000D_Danksy haar vader se testament word Ilse verplig om langs vele kronkelpaaie te reis voor sy die eindpunt van die lang, duister tonnel kan bereik en haar droomster kan gryp. Gelukkig ken die liefde sy eie tyd._x000D__x000D_Keerkring van die hart_x000D_Faan Dempers neem ou dronk Joop Burger van die onderdorp se seun in diens as prokureursklerk. Hoe sou hy ooit kon raai dat Kasper nog eendag sý redder sou word - meer nog, sy ydele dogter, Liesel, s'n? _x000D_Kasper kan nie dink aan 'n tyd in sy lewe wat hy nie 'n vergeefse droom oor die hooghartige Liesel Dempers, op agtien al 'n ryp jong vrou, in sy hart probeer smoor het nie. _x000D__x000D_Maar Liesel leef net vir swierbol Rob Rabe. Wanneer sy teen haar pa se sin met dié jakkals trou, begin die wiel van die lewe draai. Skielik is dit die trotse Liesel wat aan die verloorkant staan. En dan kry oom Faan 'n hartaanval en smeek hy Kasper om in te gryp. Want hy ken Kasper se geheim, en weet dat dié skugter man miskien Liesel se laaste redding kan wees.